カラフトナヨロ惣乙名文書・満洲語・二・満洲文字
ᠮᡝᡳᡵᡝᠨ ᡳ ᠵᠠᠩᡤᡳᠨ ᠶᠠᠮᡠᠨ ᡳ ᠪᡳᡨᡥᡝ
ᠮᡝᡳᡵᡝᠨ ᡳ ᠵᠠᠩᡤᡳᠨ ᠶᠠᠮᡠᠨ ᡳ ᠪᡳᡨᡥᡝ᠈ ᡨᠣᠣ ᡥᠠᠯᠠ᠈ ᡥᠠᠯᠠᡳ ᡩᠠ ᠣᡵᡴᠣᠪᠰᠣ᠈ ᡤᠠᡧᠠᠨ ᡳ ᡩᠠ ᡨᡠᠰᠣᡴᡠᡵᡩᡝᠩᡤᡳ ᠰᡝᡩᡝ ᠠᠯᡳᠪᡠᡥᠠ᠉ ᡠᠯᡥᡳᠪᡠᠮᡝ ᠰᡝᠯᡤᡳᠶᡝᡵᡝ ᠵᠠᠯᡳᠨ᠈ ᡳᠯᠠᠨ ᠪᡳᠶᠠᡳ ᠵᡠᠸᠠᠨ ᠵᡠᠸᡝ ᡩᡝ᠈
ᠵᡳᠶᠠᠩᡤᡳᠶᡡᠨ ᠶᠠᠮᡠᠨ ᠴᡳ ᡠᠩᡤᡳᡥᡝ ᠪᡳᡨᡥᡝᡩᡝ᠈ ᠰᠠᡴᡳᠨᡳ ᠰᡝᡵᡝ ᠵᠠᠯᡳᠨ᠈ ᠪᠣᡳᡤᠣᠨ ᡶᡳᠶᡝᠨᡨᡝᠨ ᡳ ᠠᠯᡳᠪᡠᡥᠠᠩᡤᡝ᠈ ᠠᠪᡴᠠᡳ ᠸᡝᡥᡳᠶᡝᡥᡝ ᡳ ᡩᡝᡥᡳᠴᡳ ᠠᠨᡳᠶᠠ ᡳᠯᠠᠨ ᠪᡳᠶᠠᡳ ᡳᠴᡝ ᡩᡝ ᠠᠯᡳᠮᡝ ᡤᠠᡳᡥᠠ᠈ ᠠᠯᡳᡥᠠ ᠪᡳᡨᡥᡝᡳ ᡩᠠ ᡥᡳᠶᠠ ᡴᠠᡩᠠᠯᠠᡵᠠ ᡩᠣᡵᡤᡳ ᠠᠮᠪᠠᠨ ᡨᠣᠨᡩᠣ ᠪᠠᡨᡠᡵᡠ ᡤᡠᠩ ᠰᡝᡳ ᠵᠠᠰᡳᡥᠠ ᠪᡳᡨᡥᡝᡩᡝ᠈ ᠠᠪᡴᠠᡳ ᠸᡝᡥᡳᠶᡝᡥᡝ ᡳ ᡩᡝᡥᡳᠴᡳ ᠠᠨᡳᠶᠠ ᠵᡠᠸᡝ ᠪᡳᠶᠠᡳ ᡳᠴᡝ ᠰᡠᠨᠵᠠ ᡩᡝ
ᡥᡝᠰᡝ ᠸᠠᠰᡳᠮᠪᡠᡥᠠᠩᡤᡝ᠈ ᠶᠠᠶᠠ ᡤᡝᠮᡠᠨ ᡥᡝᠴᡝᠨ ᡩᡝ ᠵᡳᡥᡝ ᡥᡝᠵᡝ ᡶᡳᠶᠠᡴᠠ[1] ᡳ ᠯᡳᡩᠠᡴᠠ᠈ ᠮᠠᠮᠠ ᡝᡵᡧᡝᡵᡝ ᡩᡝ ᠨᡳᠮᡝᠮᡝ ᠠᡴᡡ ᠣᡥᠣ ᠪᡳᠮᡝ᠈ ᠣᠩᡤᠣᠯᠣ ᡳᠨᡠ ᡝᡵᡝ ᡤᡝᠰᡝ ᠪᡳᡥᡝ᠈ ᡝᡵᡝᠪᡝ ᡨᡠᠸᠠᠴᡳ ᠴᡝᠨᡳ ᠪᡝᠶᡝ ᡤᡝᠮᡠ ᡝᠰᡥᡠᠨ᠈ ᠴᡝ ᡤᠣᡵᠣ ᠪᡳᠴᡳ ᠠᠯᠪᠠᠨ ᠵᠠᡶᠠᠮᡝ ᠰᠠᡵᡤᠠᠩᠠᡳᠮᡝ ᡤᡝᠮᡠᠨ ᡥᡝᠴᡝᠨ ᡩᡝ ᠵᡳᡶᡳ ᠮᠠᠮᠠ ᡝᡵᡧᡝᡵᡝ ᡩᡝ ᠨᡳᠮᡝᠮᡝ ᠠᡴᡡ ᠣᡥᠣ ᠣᡥᠣᠩᡤᡝ ᡠᠮᡝᠰᡳ ᠵᡳᠯᠠᡴᠠ᠈ ᡝᠰᡝ ᡩᠠ ᠪᠠᠴᡳ ᡤᡝᠮᡠᠨ ᡥᡝᠴᡝᠨ ᡩᡝ ᡳᠰᡳᡵᠠᡵᡝᠩᡤᡝ ᠵᡠᡤᡡᠨ ᡠᠮᡝᠰᡳ ᡤᠣᡵᠣ ᠪᡳᠮᡝ ᡤᡝᠮᡠᠨ ᡥᡝᠴᡝᠨ ᡩᡝ ᡨᡠᠸᡝᡵᡳ ᡩᡠᠪᡝᠰᡳᠯᡝᡵᡝ᠈ ᠨᡳᠶᡝᠩᠨᡳᠶᡝᡵᡳ ᡩᠣᠰᡳᡵᡝ ᠨᡝᡵᡤᡳᠨᡩᡝ ᠮᠠᠮᠠ ᡝᡵᡧᡝᡵᡝᠩᡤᡝ ᠯᠠᠪᡩᡠ᠈ ᠴᡝᠨᡩᡝ ᠯᠠᠪᡩᡠ ᡨᡠᠰᠠ ᠠᡴᡡ᠈ ᡥᠣᠨᠣ ᡝᡵᡳᠨ ᡳ ᡧᠠᡥᡡᡵᡠᠨ ᠰᡝᡵᡠᡴᡝᠨ ᠪᡝ ᠪᠣᡩᠣᠮᡝ ᡝᡵᡩᡝᡴᡝᠨ ᡳ ᠵᡳᠪᡠᡶᡳ ᡠᡨᡥᠠᡳ ᡥᡡᡩᡠᠨ ᡳᠴᡳᡥᡳᠶᠠᡶᡳ ᠠᠮᠠᠰᡳ ᡠᠩᡤᡳᠴᡳ ᡨᡝᠨᡳ ᠰᠠᡳᠨ᠈ ᡝᡵᡝᠪᡝ ᡳᠯᡩᡠᠨ ᡩᡝ ᡤᡳᡵᡳᠨ ᡠᠯᠠᡳ ᠵᡳᠶᠠᠩᡤᡳᠶᡡᠨ ᡩᡝ ᠵᠠᠰᡳᡶᡳ᠈ ᡝᡵᡝᠴᡳ ᠵᡠᠯᡝᠰᡳ ᡥᡝᠵᡝ ᡶᡳᠶᠠᡴᠠ ᡳ ᡠᡵᠰᡝ ᡤᡝᠮᡠᠨ ᡥᡝᠴᡝᠨ ᡩᡝ ᠵᡳᡶᡳ ᠠᠯᠪᠠᠨ ᠵᠠᡶᠠᠮᡝ ᠰᠠᡵᡤᠠᠩᠠᡳᡴᡳ ᠰᡝᡵᡝᠩᡤᡝ ᠪᡳᠴᡳ᠈ ᡴᡝᠮᡠᠨᡳ ᠨᡝᠨᡝᡥᡝ ᠰᠣᠩᡴᠣᡳ ᠴᡝᠮᠪᡝ ᡥᠣᠨ ᠰᡳᡨᠠᠪᡠᡶᡳ ᡨᡠᠸᡝᡵᡳ ᡝᡵᡳᠨᡩᡝ ᠵᡠᡵᠠᠮᠪᡠᡶᡳ ᡤᡝᠮᡠᠨ ᡥᡝᠴᡝᠨ ᡩᡝ ᡠᠩᡤᡳᠴᡳ ᠣᠵᠣᡵᠠᡴᡡ᠈ ᡠᡵᡠᠨᠠᡴᡡ ᠨᠠᡩᠠᠨ ᠵᠠᡴᡡᠨ ᡠᠶᡠᠨ ᠪᡳᠶᠠᡳ ᠰᡝᡵᡤᡠᠸᡝᠨ ᡠᠴᡠᡵᡳ ᠪᡝ ᠠᠮᠴᠠᠮᡝ ᠵᡳᠪᡠᡶᡳ᠈ ᡥᠠᡵᠠᠩᡤᠠ ᠪᠠᠴᡳ ᡠᡨᡥᠠᡳ ᡴᠣᠣᠯᡳ ᠰᠣᠨᡴᠣᡳ ᡳᠨᡩᡝ ᠰᠠᡵᡤᠠᠨ ᡳᠰᡳᠪᡠᠮᡝ ᡳᠴᡳᡥᡳᠶᠠᡶᡳ ᡩᠠ ᠪᠠᡩᡝ ᠠᠮᠠᠰᡳ ᡠᠩᡤᡳᡴᡳᠨᡳ᠈ ᡠᡨᡨᡠ ᠣᡥᠣᡩᡝ᠈ ᠴᡝᠨᡳ ᠪᡝᠶᡝ ᡠᠮᡝᠰᡳ ᡨᡠᠰᠠ ᠰᡝᡥᡝᠪᡝ ᡤᡳᠩᡤᡠᠯᡝᠮᡝ ᡩᠠᡥᠠᡶᡳ᠈ ᡝᡵᡝᡳ ᠵᠠᠯᡳᠨ ᠵᠠᠰᡳᡥᠠ ᠰᡝᠮᡝ ᡳᠰᡳᠨᠵᡳᡥᠠᠪᡳ᠈ ᡝᡵᡝᠪᡝ ᠨᡳᠩᡤᡠᡨᠠ᠈ ᡳᠯᠠᠨ ᡥᠠᠯᠠ ᠮᡝᡳᡵᡝᠨ ᡳ ᠵᠠᠩᡤᡳᠨ ᠰᡝᡳ ᠶᠠᠮᡠᠨ ᡩᡝ ᠪᡳᡨᡥᡝ ᠵᠠᠪᡠᠪᡠᡶᡳ᠈ ᡠᠯᠠᠮᡝ ᡥᡝᠵᡝ ᡶᡳᠶᠠᡴᠠ᠈ ᡴᡠᠶᡝ ᡶᡳᠶᠠᡴᠠ ᡳ ᡠᡵᠰᡝᡩᡝ ᠰᡝᠯᡤᡳᠶᡝᡶᡳ᠈ ᡝᡵᡝᠴᡳ ᠵᡠᠯᡝᠰᡳ ᠵᠠᡶᠠᠨ ᠠᠯᠪᠠᠨ ᠵᠠᡶᠠᠮᡝ ᡤᡝᠮᡠᠨ ᡥᡝᠴᡝᠨ ᡩᡝ ᠰᠠᡵᡤᠠᠩᠠᡳᠮᡝ ᡤᡝᠨᡝᡵᡝᠩᡤᡝ ᠪᡳᠴᡳ᠈ ᡠᡵᡠᠨᠠᡴᡡ ᠨᠠᡩᠠᠨ ᠵᠠᡴᡡᠨ ᠪᡳᠶᠠᡳ ᡩᠣᡵᡤᡳᡩᡝ ᠰᡝᡵᡤᡠᠸᡝᠨ ᡠᠴᡠᡵᡳ ᠪᡝ ᠠᠮᠴᠠᠮᡝ ᡳᠴᡳᡥᡳᠶᠠᡶᡳ ᡠᠩᡤᡳᡴᡳᠨᡳ ᠰᡝᠮᡝ ᠪᡳᡨᡥᡝ ᠵᠠᠪᡠᠪᡠᡴᡳ ᠰᡝᠮᠪᡳ ᠰᡝᠮᡝ ᠠᠯᡳᠪᡠᡥᠠᠪᡳ᠈ ᡝᡵᡝᡳ ᠵᠠᠯᡳᠨ ᡠᠩᡤᡳᡥᡝ ᠰᡝᠮᡝ ᡳᠰᡳᠨᠵᡳᡥᠠᠪᡳ᠈ ᡠᡨᡨᡠ ᠣᡶᡳ
ᡥᡝᠰᡝ ᠪᡝ ᡩᠠᡥᠠᠮᡝ᠈ ᠰᡠᠸᡝᠨᡳ ᡴᡠᠶᡝ ᡶᡳᠶᠠᡴᠠ ᡳ ᡠᡵᠰᡝ ᡤᡝᠮᡠᠨ ᡥᡝᠴᡝᠨ ᡩᡝ ᠠᠯᠪᠠᠨ ᠵᠠᡶᠠᠮᡝ ᠰᠠᡵᡤᠠᠩᠠᡳᡴᡳ ᠰᡝᠮᡝ ᡤᡝᠨᡝᡵᡝᠩᡤᡝ ᠪᡳᠴᡳ ᡝᡵᡩᡝᡴᡝᠨ ᡳ ᠵᡳᡶᡳ ᠨᠠᡩᠠᠨ ᠵᠠᡴᡡᠨ ᡠᠶᡠᠨ ᠪᡳᠶᠠᡳ ᡩᠣᡵᡤᡳᡩᡝ ᠰᡝᡵᡤᡠᠸᡝᠨ ᡳ ᡠᠴᡠᡵᡳ ᡤᡝᠮᡠᠨ ᡥᡝᠴᡝᠨ ᡩᡝ ᡳᠰᡳᠨᠠᠮᡝ ᡤᡝᠨᡝᡴᡳᠨᡳ᠈ ᡝᡵᡝᡳ ᠵᠠᠯᡳᠨ ᡠᠯᡥᡳᠪᡠᠮᡝ ᠰᡝᠯᡤᡳᠶᡝᡥᡝ᠉
ᠠᠪᡴᠠᡳ ᠸᡝᡥᡳᠶᡝᡥᡝ ᡳ ᡩᡝᡥᡠᠴᡳ ᠠᠨᡳᠶᠠ ᡳᠯᠠᠨ ᠪᡳᠶᠠᡳ ᠣᡵᡳᠨ᠉
- ^ 『欽定清漢對音字式』道光十六年三月十九日內閣奉 p.56第八行 [正式には: ᡥᡝᠵᡝ ᡶᡳᠶᠠᡥᠠ, heje fiyaha“ホジェン族/ナナイ人”]